Presidenti rus Putin vlerësoi presidentin e sapozgjedhur të SHBA-së, Trump, si një politikan “inteligjent dhe me përvojë”, i aftë për të gjetur “zgjidhje”, ndërkohë që tensionet midis Moskës dhe Perëndimit janë në rritje lidhur me luftën në Ukrainë.
Duke folur me gazetarët në Kazakistan, Putin kritikoi presidentin Joe Biden për krijimin e “vështirësive shtesë” për administratën e ardhshme të Trump, pasi Biden i dha Ukrainës lejen për të gjuajtur raketa amerikane me rreze më të gjatë veprimi, të quajtur ATACMS, në objektiva thellë brenda Rusisë.
Presidenti rus kërcënoi gjithashtu se do e godasë përsëri Ukrainën me një raketë balistike me aftësi bërthamore, të quajtur “Oreshnik”, pas sulmit të gjerë të Moskës natën e së mërkurës që synonte objektet jetike të infrastrukturës energjetike.
I pyetur nëse vendimi i Biden do ndikonte në marrëdhëniet e ardhshme midis Moskës dhe Uashingtonit, Putin sugjeroi se gjërat mund të përmirësoheshin pasi Trump të marrë detyrën në janar.
“Me sa mund të përfytyroj, presidenti i sapozgjedhur është një burrë i zgjuar dhe tashmë me mjaft përvojë. Unë mendoj se ai do të gjejë një zgjidhje”, tha Putin.
Trump është zotuar të përfundojë luftën në Ukrainë “brenda 24 orëve”, pa thënë se si.
