Kryetari i Alternativës, Zeqirija Ibrahimi, mbrëmë gjatë një takimi në
Kërçovë, adresoi akuzat e opozitës se koalicioni VLEN ka hyrë në qeveri
me një marrëveshje që përfshin kompromisin për Kërçovën. Në fjalimin e
tij, Ibrahimi i hodhi poshtë këto pretendime, duke e cilësuar si shpifje
dhe spekulim politik.
“Ju garantoj me përgjegjësinë më të lartë se kjo nuk ka ndodhur.
Kërçova nuk është pjesë e asnjë marrëveshjeje të fshehtë apo të hapur.
Alternativa në kuadër të koalicionit VLEN, ka hyrë në qeveri me qëllimin
e vetëm për t’u shërbyer qytetarëve dhe për të mbrojtur interesat e
tyre,” theksoi Ibrahimi.
Në vijim, ai drejtoi një sfidë të drejtpërdrejtë ndaj liderit të BDI-së,
Ali Ahmeti, duke e pyetur nëse edhe ai mund të japë një garanci të
ngjashme:
“A është i gatshëm Ali Ahmeti të garantojë se nuk ka hyrë në dhomën 161
dhe nuk ka qenë i gatshëm ta dorëzojë Kërçovën?”
