Amazon ka paguar 40 milionë dollarë për ekskluzivitetin e një dokumentari mbi jetën e Melania Trump. Filmi do të tregojë udhëtimin e saj nga Sllovenia në SHBA dhe transformimin nga modele në Zonjë të Parë.
Sipas marrëveshjes, Melania Trump ka kontroll krijues dhe do të përfitojë një pjesë të fitimeve. Kompania Amazon ka njoftuar një marrëveshje prej 40 milionë dollarësh për të licencuar një dokumentar mbi jetën e Melania Trump, i cili do të transmetohet në platformën Prime Video.
Dokumentari, me regji të Brett Ratner dhe prodhuar nga Fernando Sulichin, do të tregojë jetën e Melanias që nga Sllovenia deri në Shtetet e Bashkuara, duke shfaqur transformimin e saj nga modele në Zonjë të Parë.
Do të përfshihen edhe paraqitje të bashkëshortit të saj, presidentit të zgjedhur të SHBA Donald Trump, dhe djalit të tyre, Barron. Filmi do të fokusohet në momente kyçe të jetës së Melania-s, duke përfshirë suksesin e saj në modë, kohën në Shtëpinë e Bardhë dhe rolin si nënë.
Melania Trump do të ketë kontroll të plotë krijues mbi projektin dhe do të përfitojë një pjesë të fitimeve. Sipas raportimeve, Amazon mori të drejtat për dokumentarin pasi mundi një ofertë prej 14 milionë dollarësh të Disney për këtë marrëveshje.
Xhirimet filluan në dhjetor 2024, një muaj pas rizgjedhjes së Donald Trump si president, dhe dokumentari pritet të publikohet në mesin e vitit 2025, disa muaj pas inaugurimit të tij. Filmi do të ketë një shfaqje të kufizuar në kinema përpara publikimit në Prime Video.
Ky është projekti i parë regjisorial për Brett Ratner pas akuzave për ngacmim seksual në vitin 2017, të cilat ai i ka mohuar. Marrëveshja ka ngjallur diskutime për rikthimin e tij në industrinë e filmit, si dhe për zgjedhjen e Amazon për ta mbështetur.
Marrëdhënia mes themeluesit të Amazon, Jeff Bezos, dhe Donald Trump ka pasur ulje-ngritje gjatë viteve. Gjatë mandatit të tij të parë si president, Trump kritikoi Amazon dhe pronësinë e Bezos mbi The Ëashington Post, por kohët e fundit duket se ka pasur një afrim mes palëve.
Përveç dokumentarit, Amazon ka njoftuar gjithashtu një donacion prej 1 milion dollarësh për fondin e inaugurimit të Presidentit të zgjedhur dhe planifikon të transmetojë inaugurimin e tij në shërbimin Prime Video.
Ky dokumentar ofron një vështrim të pashembullt mbi jetën e Melania Trump, duke përfshirë momentet e saj personale dhe publike, dhe pritet të tërheqë një audiencë të gjerë për shkak të interesit në jetën e saj dhe dinamikave të familjes Trump.
